જિનાલયનો દીવો વાપરવા અંગે

જિનાલયનો દીવો વાપરવા અંગે ઊંટડીનું દ્રષ્ટાંત

 

                 ઈન્દ્રપુર નગરમાં દેવસેન નામે એક વ્યહવારી હતો અને ધનસેન નામે એક ઊંટ સવાર તેનો સેવક હતો. ધનસેનના ઘરથી દરરોજ એક ઊંટડી દેવસેનના ઘરે આવતી. ધનસેન તેને મારી ફૂટીને પછી લઈ જાય , તો પણ તે સ્નેહને લીધે પછી દેવસેનને ઘેર જ આવીને રહે. એમ થવા લાગ્યું. ત્યારે દેવસેને તેને વેચાતી લઈને પોતાના ઘરમાં રાખી અને પરસ્પર બંને પ્રીતિવાળા થયા.

 

                    કોઈ સમયે જ્ઞાની મુનિરાજને ઊંટડીના સ્નેહનું કારણ પૂછતાં તેમણે કહ્યું કે , " એ ઊંટડી પૂર્વ ભવે તારી માતા હતી. એણે ભગવાન આગળ દીવો કરીને તે જ દીવાથી ઘરના કામ કર્યા. ઘૂપઘાણામાં રહેલા અંગારાથી ચૂલો સળગાવ્યો. તે પાપ કર્મથી એ ઊંટડી થઈ. "

 

                 કહ્યું છે કે - જે મૂઢ મનુષ્ય ભગવાનને અર્થે દીવો તથા ધૂપ કરીને તેથી જ પોતાના ઘરના કામ મોહથી કરે છે , તે વારંવાર તિર્યચપણું પામે છે. આ રીતે તમારો બંનેનો સ્નેહ પૂર્વભવના સંબંધથી આવેલો છે.